L’EPILOGO ’E BIC

Erano ’e sette ’e sera quanno sunaje ’o telefono, e i’ ero pronto a risponnere.

“Bonasera, signor Frega. So’ Valeria, d’’o Sheraton Hotel ’e Reggio Calabria. Scusate ’o disturbo. Ve chiammo a nomme d’’o Direttore Generale pe v’addimannà si dimane matina, verso ’e 10:30, putite passà pe ’na questione ca ve riguarda.”

“Certamente. Ma sapite, i’ so’ nu tipo ansioso. Si fusseve accussì gentile ’e me dà ’na mezza parola ’ncopp’’o fatto, putarría arrivà preparato e pronto.”

“’A verità, nun v’’o avarría dicere. Ma ’n pratica, se tratta ’e nu debbito ca ha lassato ’a collega vosta francese quacche semmana fa. Ce dicette essa ’e ve cuntattà pe sistemà ’a cosa.”

“Dicite ô Direttore Generale ca dimane matina stongo llà. Grazie.”

’Na collega francese?

E chi diavolo era?

’E tutte ’e pussibbilità, ’o sulo nomme ca me venette ’n capa fuje Chanel.

E pecché s’avesse chiammata collega mia e m’avesse lassato nu guaio ca manco era ’o mio?

’O juorno appriesso arrivaje a ll’albergo.

’O Direttore Generale me salutaje cu calore e me dette subbeto ’na lettera ca era stata cunsignata llà a nomme mio.

Pure si nun erano n’ufficio postale, avevano accettato cu gentilezza ’e ’a ricevere, pecché i’ e pàtemo eravamo cliente lloro, a nomme d’’a casa madre nosta, Gillette, ’a cchiù ’e cinquant’anne.

Po’ ’o Direttore Generale m’addimannaje si ero disposto a pavà ’o debbito d’’a collega mia, e i’ l’addimannaje quanto era.

“Quase me metto scuorno a v’’o cercà,” dicette, “ma ’a signora ha vuluto pe forza ca vuje pavasseve ’o debbito primma ’e arapì ’a busta.”

“Quanto aggi’’a dà?”

“Signor Frega: nu dollaro americano.”

Ma che figlia ’e ’na zoccola, chella francese.

Surridette.

Ce salutajemo.

Po’ ascette fora pe arapì ’a lettera e leggerla.

Ammore mio, mo capisce che se prova a pavà nu dollaro.

Vase,

’A Chanel toja

Ma nun fernesce ccà.

Nun tenevo ’a macchina, e ’e pullman nun ’e pigliavo maje.

’A vita dint’’e granne capitale furastiere m’aveva ’mparato a cammenà, e accussì me ne jette a casa a pere, doppo quase tre chilometre.

Sunaje ’o campanello.

Figliema arapette ’a porta e alluccaje:

“Surpresa!!!!”