’A PAZZIA LUCIDA GILLETTE

DIECE STANZE D’’A CAPA

Ce sta ’na casa addò ognuno ’e nuje abita senza averla maje scigliuta.

Nun tene indirizzo. Nun cumpare ’ncopp’a nisciuna mappa. Eppure ’a canuscimmo meglio ’e qualunque posto addò avimmo campato overamente. Dinto ce stanno diece porte.

Cierte ’e rapimmo ogne juorno senza ce ne addunà.

Ate ’e tenimmo chiuse a chiave, facenno finta ca nun teneno niente a che fà cu nuje.

E po’ ce stanno stanze ca nun avimmo fravecato nuje, eppure, chi sa comme, ce ’e purtammo dinto ’o stesso. Chesta nun è ’na teoria.

Nun è nu manuale ’e psicologia ca piglia povere ’ncopp’a nu scaffale.

È ’o cunto ’e n’ommo ca è passato pe chesti diece stanze una pe una, spisso senza sapé addò steva, e ca mo, cu quacche anno ’e cchiù ’ncopp’’e spalle, cerca ’e ’e descrivere precise comme ’e ha vissute.

Diece porte.

’E rapette tutte quante.

Cierte cu curiosità.

Cierte senza voglia.

Cierte sulo quanno era già troppo tarde pe turnà arreto.

Si chesti stanze ve pareno canusciute, nun è pecché cuntano ’a storia mia.

È pecché, a quacche parte llà sotto, cuntano pure ’a vosta.

Ferdinando

PAZZIA LUCIDA — Visione

Ce sta nu territorio ca poca gente ricanosce.

Sta tra ’o caos e ’a chiarezza.

Tra ’a ferita e ’o capì.

Tra ’o crollo e ’o rinascere.

I’ ’a chiammo pazzia lucida.

Llà, ’e cullegamente addeventano visibbile.

’E maschere cadeno.

’E dettaglie accummenciano a parlà.

È difficile a spiegà.

Chi nun ll’ha maje pruvata ’a scagna pe confusione.

Overamente, è ’o cuntrario.

È troppa chiarezza.

Troppa realtà guardata tutta ’na vota.

Chi campa dint’’a pazzia lucida nun s’è perzo.

Sta sulo viaggianno pe poste addò ll’ate nun so’ ancora arrivate.

’Na vota jettemo a truvà nu cliente ca nun pavava maje a tiempo.

’E ritarde suoje ’o purtavano sempe arreto dint’’a lista d’’e cunte scadute.

Se ne ’mmiscaje pure ’o credit manager.

Veneva ’a Milano.

Cchiù analitico.

Cchiù raziunale.

Meno emotivo.

Eppure ’o cliente nun senteva raggione.

Passaje ’o tiempo.

Nu juorno ’o ’ncuntraje n’ata vota.

Lle dicette:

“Cumplimente. ’O nomme vuosto nun sta cchiù dint’’a lista d’’e scadute. Finalmente site addeventato comme a tutte ll’ate.”

Me guardaje.

Facette nu surriso.

E rispunnette:

“Caro amico mio, guardate n’ata vota. Si nun m’avite visto, nun vo’ dì ca i’ nun ce stongo.”

’A chillu mumento capette ’na cosa.

’A pazzia lucida nun è vedé chello ca nun esiste.

È vedé chello ca esiste mentre tutte ll’ate guardano a n’ata parte.